Kami menerima tulisan, artikel, laporan kegiatan dan saran-saran untuk dipublikasikan ke blog Pdt. Pahala J. Simanjuntak,MTh dengan mengirim e-mail ke: psh06simanjuntak@yahoo.com .

14 Juli 2010

Punguan Ina

Punguan Ina HKBP Panjang mangebati HKBP Marina Hutanamora

Na di ari Minggu 4 Juli 2010 na salpu i ro do punguan Ina sian HKBP Panjang Ressort Panjang Bandar Lampung Distrik XV Sumbagsel mangebati huria HKBP Marina Hutanamora Ressort Simorangkir Distrik II Silindung. Amanta Pdt. Sumihar Sitohang, STh Pandita ni HKBP Ressort Panjang do manguluhon punguan i nidonganan ni dua halak parhalado. Ima amanta St. P. Lumbantobing dohot St. Gembira Manurung. Asa pungu ma nasida sude 30 halak. Hombar tu napinaboa ni amanta St. P. Lumbantobing, andorang so sahat ninna tu HKBP Marina Hutanamora nunga jumolo nasida mangebati Panti Karya Hephata na di Laguboti, ima di ari Sabtu 3 Juli 2010. Mamereng angka donganta sahaporseaon na so boi marnida (tuna netra). Dibereng nasida do boha panghobasion ni HKBP patureturehon angka donganta namartihas i marhite angka pangula ni huria na adong disi. Dipasahat nasida do ninna saotik pangurupion songon dalan pajumpang dohot pangisi ni Panti Karya i. Dung sidung nasida sian Hephata torus ma nasida tu huta Seminarium Sipoholon laos marborngin ma nasida disi dua ari.
Manogot ni ari Minggu i borhat ma punguan i tu HKBP Marina Hutanamora laho mandohoti parmingguon dohot pangebation. Di tingki parmingguon i dipatubegehon nasida do ende pujipujian tu Debata marhite angka koor na tabo begeon ni sipareon.
Marnida haroro nasida i tung di bagasan las ni roha do sude ruas ni huria HKBP Marina Hutanamora manjangkon tamue i. Sude punguan Ina marpahean saragam hinorhon ni las ni rohana pajumpang dohot donganna sapunguan sian tano parserahan. Amanta St. P. Pasaribu, uluan ni HKBP Marina Hutanamora pasahathon hata mauliate tu rombongan i huhut patoranghon haruason ni huria i. Dipabotohon do haburjuon ni sude ruas manggarar angka iuran dohot mandohoti angka program naung tinontuhon ni huria i. Ummarga sian tahe tung di bagasan haringgason do huria i mandohoti parmingguon dohot partangiangan siganup minggu. Suang songon i do nang haringgason ni punguan Ina mandohoti parpunguan si sahali saminggu (mararikamis) huhut manguru ende.
Asa dung simpul tingki parmingguon dipatupa huria Hutanamora i do partamueon marhite na marsipanganon dohot mandok hata na uli huhut pasahathon ”tanda kenang-kenangan”. Ima sada ulos na na marsurathon punguan Ina HKBP Marina Hutanamora. Laos dipasahat punguan Ina HKBP Panjang i do nang gombaran ni Silang songon tanda ni haroro nasida tu huria on.
Di tingki na mandok hata i dipatolhas amanta Pdt. Sumihar Sitohang do angka program ni punguan Ina HKBP Panjang di taon 2010. Sada sian natinaringotanna i, ima “wisata rohani” seksi parompuan huhut mangebati huria HKBP di bona pasogit. Sialani i dipabangkit ma panitia kinetuaan ni Ny. J.M. Simarmata br. Silaban rap dohot angka seksi laho manghobasi na hombar tu ulaon i.
Dung sidung pangebation sian HKBP Marina Hutanamora diuduti ma muse tu Salib Kasih Siatas Barita dohot tu taman Iman Sitinjo Dairi. Laos sian i ma muse nasida mulak tu Bandar Lampung. Sahalak sian rombongan i, ima Ny. Sihotang br. Sinaga manghatindanghon haulion ni parsaoran dohot angka pamandangan na adong di rura Silindung dohot di huta Seminarium. “Patubu las ni roha dohot haporseaon ma i tu hita saluhutna tarlumobi tu hami na ro sian parserahan” ninna inanta i uju naeng mulak sian huta Siatas Barita Tarutung.

Tidak ada komentar: